BE-ja ka njoftuar për hetime ndaj disa prej kompanive më të mëdha teknologjike në botë për shkelje të mundshme të ligjeve.
Bëhet e ditur se për shkelje të mundshme të Aktit të Tregjeve Dixhitale (DMA) po hetohen Meta, Apple dhe Alphabet që e zotëron Google.
Nëse zbulohet se kompanitë i kanë thyer rregullat, ato mund të përballen me gjoba të mëdha deri në 10 për qind të të hyrave vjetore të tyre, shkruan BBC, përcjell Telegrafi.
Ky vendim vjen tre javë pasi BE-ja gjobiti Apple me 1.8 miliardë euro për shkeljen e ligjeve të konkurrencës mbi transmetimin e muzikës.
Por, një zëdhënës i Apple thotë se kompania do të angazhohet në mënyrë konstruktive me hetimin pasi janë të sigurt se plani i tyre përputhet me Aktin e Tregjeve Dixhitale dhe se nuk ka shkelje nga ana e tyre.
Gjithashtu, kompania ka bërë të ditur se ekipet e saj kanë krijuar një sërë mekanizmash për të respektuar legjislacionin historik të BE-së, mbrojtjen e privatësisë dhe sigurisë për përdoruesit evropian.
Ndryshe, Bashkimi Evropian do të hetojë pesë raste të ndryshme ku dyshohet për shkelje rregullash:
1 dhe 2 – Nëse Apple dhe Alphabet nuk po i lejojnë aplikacionet të komunikojnë lirshëm me përdoruesit dhe të bëjnë kontrata me ta
3 – Nëse Apple nuk po u jep përdoruesve zgjedhje të mjaftueshme
4 – Nëse Meta po u kërkon njerëzve në mënyrë të padrejtë të paguajnë për të shmangur përdorimin e të dhënave të tyre për reklama
5 – Nëse Google preferon mallrat dhe shërbimet e vetë firmës në rezultatet e kërkimit
Të pesë rastet janë të përqendruara te konsumatorët dhe janë të lidhura me shumicën e njerëzve që përdorin shërbime nga këto kompani, e që së bashku janë miliarda njerëz në mbarë botën.
Hetimi thuhet se do të zgjasë rreth 12 muaj për t’u përfunduar.