Ish-kryeministri pakistanez dënohet me 14 vjet burg për korrupsion

Në Jan 31, 2024

Ish-kryeministri pakistanez Imran Khan dhe gruaja e tij Bushra Bibi janë dënuar me nga 14 vjet burg për korrupsion. Dënimi i Khan vjen një ditë pasi ai u dënua me 10 vjet burg për një rast tjetër, shkruan BBC.

Khan u rrëzua nga posti i kryeministri nga kundërshtarët e tij në vitin 2022. Të martën ai është dënuar për rrjedhje të sekreteve shtetërore ndërkohë që të mërkurën për një rast tjetër të korrupsionit.

Khan ka thënë se rastet e shumta kundër tij janë të motivuara politikisht. Ai është dënuar vetëm një javë para mbajtjes së zgjedhjeve në Pakistan.

Besohet se dënimet ai do t’i vuajë njëkohësisht.

Khan më herët ka qenë i dënuar edhe me tre vjet burgim pasi që ishte shpallur fajtor për akuzën se kishte shitur dhurata në vlerë prej 501 mijë dollarësh, që kishin qenë në pronësi të shtetit.

Që nga arrestimi i tij në gusht të vitit të kaluar ai mbahet kryesisht në burgun në Adiala.

Gruaja e tij gjithashtu është dërguar në burg pas vendimit të së mërkurës.

Ata janë martuar në vitin 2018, disa muaj para se Khan të zgjidhej kryeministër.

Përveç dënimit me burg ata janë obliguar të paguajnë edhe 1.5 miliardë rupi, 5.3 milionë dollarë.