Trajneri i Spanjës thotë që të mos nënvlerësohet Shqipëria
Trajneri i Spanjës Luis de la Fuente ishte në Hamburg të shtunën për shortin e fazës së grupeve për Kampionatin Evropian të verës së ardhshme, i cili do të mbahet në Gjermani.
Furia e Kuqe do të ketë punë, pasi është shortuar në grup me Shqipërinë, Kroacinë dhe Italinë.
Duke folur për mediat pas përfundimit të shortit, De la Fuente vlerësoi të ashtuquajturin “grupi i vdekjes” dhe u sigurua që ta vinte në pah Shqipërinë krahas Italisë dhe Kroacisë si kundërshtarë shumë të vështirë.
“Është një grup që do të kërkojë shumë prej nesh. Do të na duhet të prodhojmë performancat tona më të mira. Të mos harrojmë Shqipërinë, e cila ishte në krye të grupit të tyre. Italia është një ekip i madh, i trajnuar mirë dhe ne e njohim Italinë dhe Kroacinë nga Liga e Kombeve”.
“Nuk ka lojë të lehtë në Euro 2024. Ndihemi të fortë dhe të fuqishëm. Jam i sigurt se rivalëve nuk u pëlqen fakti që u ka rënë Spanja”, vazhdoi ai.