E duan United dhe Juventus, Kalvin Phillips vendos kushtin për transferimin

Kalvin Phillips do të kërkojë garanci për kohën e tij të lojës nga çdo skuadër që interesohet për të, me mesfushorin që kërkon të largohet nga Manchester City në janar.

Anglezi ka bërë vetëm 10 paraqitje për Cityn në të gjitha kompeticionet këtë sezon. Katër prej tyre kanë qenë në Premier League, duke arritur në total vetëm 89 minuta në kampionatin anglez.

Skuadra si Manchester United, Newcastle dhe Juventus raportohet se po e ndjekin 28-vjeçarin, por The Telegraph raporton se palët e interesuara do të duhet t’i garantojnë atij vendin në formacion në mënyrë që ai të pranojë ofertën.

Juve mund të ketë shanset më të mira për ta transferuar atë, sepse kanë nevojë për një mesfushor për shkak të pezullimeve afatgjata të Nicolo Fagiolit dhe Paul Pogba, ndërsa Newcastle po mbështetet te Joelinton dhe Bruno Guimaraes për të plotësuar mungesën e Sandro Tonalit.

Juventusi thuhet se ka hapur tashmë bisedimet për nënshkrimin e Phillips. Skuadra e Serie A është e hapur për nënshkrimin e tij në formë huazimi deri në fund të sezonit, megjithëse pengesa kryesore mund të jetë klauzola për ta nënshkruar atë në mënyrë të përhershme në verë.

Pasi u aktivizua nga stoli gjatë gjysmëfinale të Kupës së Botës për Klube të fituar nga City kundër Urawa Reds këtë javë, Phillips mund t’i jepet një tjetër shans kur City të përballet me Fluminense në finalen e kompeticionit të premten përpara se të fillojë negociatat për një largim në janar.