Opozita: Kësaj legjislature do t’i japim fund, vendin do ta dërgojmë në zgjedhje
Partitë opozitare PDK dhe AAK, kanë akuzuar Qeverinë e Kosovës lidhur me vendimin për blerjen e teksteve shkollore.
PDK madje është zotuar se do ta dërgoj vendin në zgjedhje.
Kështu është shprehur shefi i Grupit Parlamentar të PDK-së, Abelard Tahiri.
“Seancën e sotme e kemi thirr si deputet të opozitës për një çështje të rëndësishme që prek mbi 100 mijë familje dhe rreth 210 mijë nxënës. Besoj që nuk ka gjë më të arsyeshme që sot të hapej sesioni vjeshtor në Kuvend me një çështje që është jetike e që prek ardhmërinë e vendit tonë”, ka thënë Tahiri.
Ai ka shtuar se tani e tutje nuk ka asnjë arsye të vetme që kjo legjislaturë ta vazhdoj punën.
“Ata po e degradojnë Kosovën në secilin rrafsh të mundshëm. Ata nuk u turpëruan nga ne që nuk erdhën në seancë, por u turpëruan nga nxënësit dhe prindërit. Si grup parlamentar do të angazhohemi që vendin ta dërgojmë në zgjedhje dhe kësaj legjislature ti japim fund”, tha Tahiri.
Edhe deputetja e PDK-së, Eliza Hoxha theksoi se kjo është edhe një ikje tjetër prej përgjegjësisë nga kjo qeveri.
“Ministrja Nagavci nuk ka arritur të përmbushë obligim e saj ligjor që të siguroj libra falas për nxënësit. Kjo gjendje aktuale ka krijuar katrahurë dhe shqetësim tek prindërit dhe theksim të pabarazisë”, tha Hoxha.
Shefi i Grupit Parlamentar të AAK-së, Besnik Tahiri në anën tjetër shtoi se ajo që u vërtetua sot në Kuvend është që shumica parlamentare nuk donë të ballafaqohet me të vërtetën.
“Ne kemi qenë të përgatitur për të dokumentuar që shuma që është paraparë të ndahet nuk mjafton për blerjen e librave. Në të njëjtën kohë kjo shumë as për së afërmi nuk i plotëson nevojat e nxënësve”, tha ai.
Tahiri shtoi se vendimi bie në ndesh me Ligjin në fuqi ku thuhet se shteti duhet t’i siguroj librat.
“ Barra buxhetore është rritë për dy herë. Një temë e rëndësie të veçantë bojkotohet me qëllim të vetëm që të mbuloj marrën që kjo qeveri e ka bërë me këtë vendim”, tha ai.
Tahiri shtoi se MASHTI me këtë vendim ka prodhuar krizë, për të provokuar grevë në arsim.
Ai tha se kjo krizë nuk ka qenë e nevojshme dhe si opozitë tashmë duhet të mendojnë se cilat metoda t’i përdorin për ta ndalë këtë qeveri. /Telegrafi/