Turqia është në krye të Europës për sa i përket konsumit ditor të antibiotikëve
Turqia është në vendin e parë, me konsumin më të lartë ditor të antibiotikëve në Europë, e ndjekur nga Italia, Franca dhe vendet e Ballkanit të kryesuar nga Serbia.
Antibiotikët janë një nga barnat më të përshkruara në mjekësinë njerëzore dhe veterinare. Keqpërdorimi i tyre vazhdon prej dekadash dhe në rastin e Covid-it ka pasur një konsum shtesë joracional të antibiotikëve në mbarë botën dhe si rrjedhojë kemi një rezistencë në rritje të baktereve të ndryshme ndaj antibiotikëve.
Organizata Botërore e Shëndetësisë e ka klasifikuar pandeminë e rezistencës antimikrobike në 10 kërcënimet kryesore kritike për shëndetin publik global. Është vlerësuar se pa një parandalim adekuat, rezistenca antimikrobike do të marrë 10 milionë jetë çdo vit deri në vitin 2050.
Koncepti i përdorimit joracional të antibiotikëve nënkupton përdorimin e antibiotikëve në rrethana ose në një mënyrë që nuk është adekuate. Kjo nënkupton që aplikohen antibiotikë dhe se nuk është infeksion bakterial, por viral, me çdo temperaturë të ngritur, si dhe në mënyrë “parandaluese” te pacientët me sëmundje të rëndë që “të mos kenë infeksione bakteriale”.
Gjithashtu, përdorim joracional është kur antibiotikët përdoren në një dozë joadekuate, kur terapia zgjat shumë shkurt, pra ndërpritet sapo pacienti të përmirësohet, gjë që zakonisht bëhet nga vetë pacientët, dhe jo siç përshkruhet ose kur zgjatet në mënyrë të pajustifikueshme.