Kompania Tesla do të nisë prodhimin masiv të robotëve humanoidë në vitin 2026.
Këtë e ka bërë të ditur CEO i Tesla, Elon Musk, në një mesazh në rrjetin social X.
“Tesla do të ketë robotë humanoidë vërtet të dobishëm vitin e ardhshëm që do t’i shërbejnë nevojave të prodhimit të brendshëm të kompanisë. Shpresojmë të fillojmë prodhimin masiv për kompani të tjera deri në vitin 2026”, shkroi Musk.
Ai njoftoi në vitin 2021 se një robot i quajtur Optimus së shpejti do të ishte gati për të punuar në fabrikat e Tesla-s, por kjo nuk është realizuar deri më tani, raporton theguardian.
Optimus është rreth 1.7 metra i gjatë dhe peshon 56 kilogramë dhe është projektuar për të kryer punë të rrezikshme, të mundimshme ose të mërzitshme.
Emri i tij është një aludim për Optimus Prime, udhëheqësin e fuqishëm dhe dashamirës të Autobots në ekskluzivitetin mediatik të Transformers.
Në dhjetor të vitit 2023, kompania Tesla prezantoi një gjeneratë të re të robotëve humanoidë Optimus Gen 2, çmimi i të cilëve vlerësohet midis 10-20 mijë dollarë.