Dhurohen 60 mijë dollarë për familjen e policit, Afrim Bunjaku

Shoqata e Policëve Shqiptarë në Shtetet e Bashkuara të Amerikës (ShBA) ka dhuruar 60 mijë dollarë për familjen e policit, Afrim Bunjaku, që humbi jetën në kryerje të detyrës në sulmin e 24 shtatorit në Banjskë të Zveçanit.

Policët shqiptaro-amerikanë të inkuadruar në Shoqatën Amerikane Shqiptare të zbatimit të Ligjit në ShBA, në mjediset e Konsullatës së Republikës së Kosovës në New York dorëzuan çekun e kontributit të tyre në shumë 60 mijë dollarë.

Të pranishëm ishin konsulli i përgjithshëm – ambasador Blerim Reka dhe stafi i tij.

Ky çek dedikuar familjes së heroit, Afrim Bunjaku në mënyrë simbolike, nga disa pjesëtarë të uniformave blu në New Jersey & New York si dhe themeluesi i Shoqatës Elton Shametaj iu dorëzua drejtorit të përgjithshëm të Policisë së Kosovës, Gazmend Hoxha, raporton RTK.

Policët shqiptaro-amerikanë me këtë akt edhe njëherë dëshmuan qartë atdhedashurinë e tyre.

“Ky akt i tyre e bën krenare edhe gjithë diasporën dhe mburremi nga fakti se edhe pse me mijëra kilometra larg ata bashkëndiejnë rrënjet e origjinës dhe se ritmi i jetës se tyre është i lidhur ngushtë me fatet e atdheut”, thuhet në njoftimin e shoqatës së tyre.

Nuk është ky aksion i parë që policët shqiptaro-amerikanë kanë ndërmarrë. Ata edhe më herët, përmes shoqatës së tyre, kanë kryer disa aksione për të përkrahur kolegët e tyre në Shqipëri dhe gjithandej trojeve shqiptare. E tërë fushata është realizuar përmes GoFundMe.